Í þetta skiptið ákvað ég að prófa að baka gulrótarköku sem er hugsuð fyrir fólk með sykursýki. Það sem mér fannst áhugavert við þessa uppskrift var að það er enginn viðbættur sykur í henni, heldur kemur sæta bragðið meðal annars úr bönunum og rúsínunum. Ég var því spenntur að sjá hvernig kakan myndi heppnast og hvort hún yrði jafn góð og hefðbundin gulrótarkaka.
Hráefni
75 g smjörlíki
3 gulrætur
50 g möndlur eða möndlumjöl
2 bananar
3 dl haframjöl
1 dl rúsínur
1 dl hrísmjöl
1 tsk. kanill
2 egg
Skref 1
Undirbúningur
Ég byrjaði á því að taka öll hráefnin til og hita ofninn í 180°C. Síðan bræddi ég smjörlíkið og lét það kólna aðeins áður en ég hélt áfram.
Skref 2
Gulræturnar rifnar
Næst reif ég gulræturnar niður með rifjárni og setti þær í skál. Gulræturnar eru stór hluti af uppskriftinni og gefa kökunni bæði bragð og raka.
Skref 3
Bananar + Gulrætur
Þegar gulræturnar voru tilbúnar stappaði ég bananana og bætti þeim saman við. Bananarnir gefa kökunni náttúrulega sætu og hjálpa til við að halda henni mjúkri.
Skref 4
Öllum hráefnum blandað saman
Því næst bætti ég haframjöli, hrísmjöli, möndlumjöli, rúsínum, kanil, eggjum og bræddu smjörlíkinu saman við. Ég hrærði síðan öllu vel saman þar til úr varð nokkuð þykkt deig.
Skref 5
Tilbúið í ofninn
Þegar deigið var tilbúið setti ég það í smurt kökuform og dreifði því jafnt um formið. Síðan setti ég kökuna í 180°C heitan ofn og bakaði hana í um 60 mínútur.
Skref 6
Komin úr ofninum
Eftir baksturinn var kakan orðin fallega gullinbrún að ofan. Ég tók hana úr ofninum og leyfði henni að kólna áður en ég tók hana úr forminu.
Skref 7
Tilbúin gulrótarkaka
Að lokum tók ég kökuna úr forminu og setti hana á bretti. Þá var hún tilbúin til að smakka.
Útkoman
Mér fannst kakan heppnast mjög vel og hún var góð á bragðið. Það sem kom mér helst á óvart var að mér fannst hún bragðast meira eins og bananabrauð heldur en gulrótarkaka. Það er líklega vegna þess að það eru tveir bananar í uppskriftinni sem gefa kökunni sætt og áberandi bananabragð.
Þrátt fyrir það var ég mjög ánægður með útkomuna og ég myndi alveg örugglega baka þessa köku aftur. Mér fannst líka skemmtilegt að prófa að baka köku án viðbætts sykurs og sjá hvernig hægt er að nota ávexti til að gefa henni sætt bragð.
Leave a Reply